१५ साउन,
बागलुङको जैमिनी नगरपालिका वडा नम्बर–९ का अध्यक्ष सन्दीप थापा (इन्द्र) ले घरमा पत्नी, छोराछोरी हुँदाहुँदै बहुविवाह गरेका छन्। उनको चारवटा पत्नीमध्ये दुईले छाडेको स्थानीयले बताए ।

वडाभित्रका नागरिकलाइ पर्ने पीरमर्का र गुनासो सुन्ने, पीडितका पक्षमा सिफारिस लेख्ने वडाध्यक्षको जिम्मेवारी हुन्छ । वडाध्यक्षले बहुविवाह गरेकालाई कारबाही र पीडितलाई न्याय दिनुपर्छ । बहुविवाह गरेमा वडामा दर्तासमेत हुँदैन । बहुविवाह गरेमा स्वत: रद्द हुने कानुनी व्यवस्थासमेत छ । तर जनताको पक्षमा काम गरिदिनुपर्ने व्यक्ति नै पीडक बनेर देखिएका छन् ।

वडाध्यक्ष थापा एमालेबाट वडा अध्यक्ष पदमा निर्वाचित भएका हुन् । थापाको घरमा पत्नी, ३ छोरी र १ छोरा छन् । उनले ताराखोलाकी एक युवतीसँग अर्को विवाह गरेका हुन् । यसअघि थापाले विवाह गरेकी पहिलो र तेस्रो पत्नीले छाडेका थिए ।

थापाले ती युवतीलाई दुई पटकसम्म दबाब दिएर गर्भपतन गराएका थिए । तेस्रो पटक गर्भ बसेपछि उनले विवाह गर्छु भनेर युवतीलाई फकाएर राखेको स्थानीय बताउँछन् ।

जैमिनी नगरपालिकाका प्रमुख नरबहादुर पुनले नगरपालिकामा उनीविरुद्ध उजुरी नआएको बताए । एमाले अध्यक्ष हिराबहादुर केसीले घटना विचित्रको भएको बताए । ‘यो वास्तविकता हो भने कारबाहीको दायरामा आउनैपर्छ,’ केसीले भने, ‘कानुनको बर्खिलाप हुने काम कसैले पनि गर्न पाइँदैन ।’ पार्टीबाट पनि आफ्नै अनुसन्धान हुने उनले बताएका छन्। रासस