३ मङ्सिर,
दाङ : रोल्पाको माडी गाउँपालिका-४ तार्केबाङमा भएको बस दुर्घटनामा परी मृत्यु हुने चारैजनाको सनाखत भएको प्रहरीले जनाएको छ।

प्रहरीका अनुसार मृत्यु हुनेमा रोल्पाको परिवर्तन गाउँपालिका-५ का बस चालक ४० वर्षीय वीरमान बुढा, परिवर्तन-६ का ५० वर्षीय कुमार पुन, परिवर्तन-१ का २९ वर्षीय दीपक रोका र त्रिवेणी गाउँपालिका-४ की १८ वर्षीया पुष्पा घर्ती मगर रहेका छन्।

बिहीबार साँझ दाङको घोराहीबाट थबाङका लागि छुटेको ना ३ ख ५५१८ नम्बरको यात्रुवाहक बस बिहीबार बेलुकी पौने ६ बजे दुर्घटना हुँदा चारजनाको घटना स्थलमै मृत्यु भएको थियो। उक्त दुर्घटनामा परी १९ जना घाइते भएका छन्। घाइतेमध्ये परिवर्तन-२ की २१ वर्षीया अनिता बोहराको अवस्था गम्भीर रहेको जिल्ला प्रहरी कार्यालय रोल्पाले जानकारी दिएको छ ।

घाइते भएका पाँचजनाको भैरहवा मेडिकल कलेजमा उपचार भइरहेको छ। त्यस्तै‚ अन्य ११ जनाको रोल्पा जिल्ला अस्पतालमा र तीनजनाको घर्तीगाउँ स्वास्थ्य चौकीमा उपचार भइरहेको छ। थाहा खबरबाट